08. රෝසා, මුට්ටි සහ දෙමව්පියෝ! | Rosa, Mutti & Parents

පොඩි උන් හරි අහිංසකයි, හයක් හතරක් තේරෙන්නේ නෑ. ඉතින් ගොඩක් වෙලාවට මේ පොඩි උන් මහ උන්ගේ රෙදි ගලවනවා උන්ගේ ළාමක කතා වලින්. මේ ඒ වගේ සිද්ධි දෙකක් සහ තවත් එක සිද්ධියක් ගැනයි.
අපේ ළඟ ගේක හිටියා හුරුබුහුටි කොළු පැටියෙක්. ඒ කාලේ කොල්ලට අවුරුදු 3ක් ඇති වැඩිම උනොත්. දවසක් අම්මා කාටද මන්දා බැනලා ගෙදරදි. කොළුවා ඇවිත් අපේ (අපේ කිව්වට ජනතා සන්තක කරලා නෑ ඔන්න. තනිකරම මගේ තනි අයිතිය!) නෝනට කියනවා සිද්ධිය,

"බලන්න පොඩි අක්කේ, අපේ අම්මා අද *****ට බැන්නා ගෙදරදි. රෝස බල්ලා, රෝස බල්ලා කියලා තමයි බැන්නේ" 

පොඩි එකා අර හුරතල් හඬින් කියනකොට අපි කටවල් තදකරන් හිටියා හිනාව වැඩි කමට. පොඩි එකාට රෝස කියලා ඇහුනේ මොන වචනෙද කියලා ඔහෙලට තේරෙනවා ඇතිනේ? නොදන්න කට්ටිය දන්න කෙනෙක්ගෙන් අහගත්තොත් හොඳා.

දෙවෙනි කතාව සිද්ධ වෙලා තිබුනේ අපේ ඔෆීස් එකේ යාලුවෙකුට. එතැන පොඩි කෙල්ලෙක්! පොඩි එකා නැන්දලගේ මිදුලේ සෙල්ලම් කරනකොට මාමා නැන්දට නොසෑහෙන්න බණිනවලු. ඕක අහන් හිටපු පොඩි එකී ගෙදර ඇවිල්ලා අම්මගෙන් අහනවලු,

"අම්මේ, අම්මේ, ඇයි මාමා නැන්දට මුට්ටි, මුට්ටි කියලා බනින්නේ?"

කාලා වරෙන් මඩු මාළු කිව්වලු. ඒක නිසා පොඩි උන් ඉන්න තැන් වල කතා කරද්දි කට පරිස්සම් කරගත්තොත් හොඳයි! ඒ වගේම තමයි දෙමව්පියොත් තමන්ට පොඩි දරුවෝ ඉන්නකොට ටිකක් පරිස්සමෙන් වැඩ කරන්න ඕනේ. වතාවක් අපි දන්න අදුනන ගුරුතුමියක් හරහා දැනගත්ත කතාවක් මේක.

මේ ගුරුතුමියගේ පන්තියේ (එක වසර හෝ දෙක වසර) හිටියා එක්තරා පිරිමි දරුවෙක්. මේ දරුවා දවසක් ඉස්කෝලෙට සෙල්ලම් බඩුවක් ගෙනත් අනිත් දරුවන්ට පෙන්නනවා. අහම්බෙන් වගේ මේ සෙල්ලම් බඩුව දැක්ක වයෝවෘද්ධ ගුරුතුමියට ඉහමොළ රත් උනා. සෙල්ලම් බඩුව වෙන මොකක්වත් නෙවෙයි, ඩිල්ඩෝ එකක්. දරුවට මේ උපකරණයේ බැරෑරුම්කම නොදැනෙන විදිහට ඒක තමන් අතට ගත්ත ගුරුතුමී දෙමාපියන්ට පණිවිඩයක් යැව්වා වහාම මුණගැහෙන්න එන්න කියලා. අම්මා විතරයි ආවේ. බැලින්නම් තාත්තා රට. තනියට තියාගන්න සැමියා එවපු එකක් කියලා ඒ කාන්තාව කිව්වලු. (ඒක අපිට කොහොමත් වැඩක් නෑ. ඒක ඒ දෙන්නගේ ජිවිතයනේ!)

අපේ ගුරුතුමී තරුණ පහේ මේ අම්මට එයාගේ උපකරණයත් දීලා පොඩ්ඩක් අවවාද කරලා යැව්වලු දරුවෝ අතට මේවා පත්වෙන්න දෙන්නෙපා කියලා. ඒක නිසා මොනවා කරත් තමන් දිහා බලලා හැදෙන දරු පිරිසක් ඉන්න බව මතකේ තියන් වැඩ කරන එක යහපත්!

පසුව ලියමි!

මේක මම කාලෙකට ඉහත අන්තිම පේලියට ලිව්ව පෝස්ට් එකක්. ඒ පෝස්ට් එකේ කමෙන්ට් වල ගොඩක් මේ වගේම අත්දැකීම් ගැන ලියලා තිබුනා. කැමති කෙනෙක් මෙතනට ගිහින් ඒ ටික කියෙව්වට පාඩු නෑ. ඒ වගේම රෝස, රෝසි, මුට්ටි කියන වචන වලට ඒ පෝස්ට් එකෙන් පස්සේ සෑහෙන ඉල්ලුමකුත් ඇති උනා. ඒකෙ ක්‍රෙඩිට් එක අර පොඩි උන් දෙන්නට යන්න ඕනේ.

මේක ආයෙම ලියන්න හේතු උනේ මෙන්න මේ පෝස්ට් එක කියවපු නිසයි.